सोलापूर शहरापासून अगदी दहा मिनिटांच्या अंतरावर असलेलं, सोलापूर-कोल्हापूर हायवेलगत, सीना नदीच्या जवळच्या भागात कामती खुर्द या गावाच्या परिसरात दिमाखात उभं असलेले प्रशस्त कृषी पर्यटन केंद्र म्हणजेच ‘सिनाई कृषी पर्यटन केंद्र’ एखाद्या भरभक्कम आणि डेरेदार वटवृक्षासारखं हे कृषी पर्यटन केंद्र महामार्गावरून ये-जा करणाऱ्या पर्यटकांचं लक्ष वेधून घेतं. उत्तम नियोजन, अपार कष्ट घेण्याची तयारी, कृषिपूरक व्यवसायाचा सकस अनुभव, मोठी स्वप्नं पाहून प्रत्यक्षात उतरवण्याची जिद्द आणि शेतीपूरक उद्योगातून उभारलेला अर्थसाठा या भांडवलावर लहू आवताडे यांनी २०२०मध्ये रुजवलेल्या या रानफुलाचं रोपटं आता चांगलंच मूळ धरू लागलंय,  सोलापूरपासून अगदी जवळ आणि मुख्य म्हणजे हायवेला चिकटून असल्यामुळे ‘सिनाई कृषी पर्यटन केंद्र’ सोलापूर आणि आसपासच्या परिसरातील पर्यटकांसाठी विसाव्याचं, आनंदाचं एक प्रमुख ठिकाण बनलेलं आहे. इथल्या लक्षवेधी ऐसपैस आवरामुळे पर्यटक आवर्जून या केंद्रास भेट देतात.

     सुमारे आठ एकरात (सात एकर ३९ गुंठे) उभारलेल्या या केंद्राचं प्रवेशद्वारदेखील अगदी प्रशस्त आहे. जणू काही आवताडेंच्या मोठ्या स्वप्नांचं प्रतीकच ! महाराष्ट्र राज्याच्या पर्यटन विभागाच्या मान्यतेची मोहोर उमटलेली आकर्षक अशी मोठी कमान ओलांडून पर्यटक आत आला, की नजर जाते ती दोन्ही बाजूंना (आत आणि बाहेर) असलेल्या प्रशस्त पार्किंग व्यवस्थेकडे. पार्किंगच्या समस्येने हैराण झालेल्या शहरी जिवांना हा पार्किंग लॉट पहिल्या नजरेत जिंकून घेतो. पार्किंगचं हे सुख अनुभवत पर्यटक जेव्हा पुढे सरकू लागतो, तेव्हा अलिबाबाच्या गूढ, अद्भुत गुहेसारखी सुंदर नवलाई पर्यटकांच्या डोळ्यांचं उत्साहानं स्वागत करू लागते. सुरुवातीलाच शेतशिवाराची शान असलेला स्वच्छ नितळ पाण्याचा सुंदर तलाव डोळ्यांना आल्हाद देतो. निसर्गाच्या कुशीत पहुडलेल्या या तळ्याचं पाणीदार सुख उपभोगत, नजर इकडचं तिकडचं नवलसौख्य अनुभवत, बाजूलाच थोड्या अंतरावर उभ्या असलेल्या भव्य अशा अॅडव्हेंचर पार्क, चिल्ड्रन्स पार्क यांवर खिळून राहतं.